Cyfleusterau ar gyfer Teithwyr â Symudedd Cyfyngedig

Cyfleusterau ar gyfer Teithwyr â Symudedd Cyfyngedig

Mae Maes Awyr Rhyngwladol Caerdydd wedi’i ymrwymo i ddarparu cymorth i deithwyr â symudedd cyfyngedig yn ystod eu cyfnod yn y maes awyr, o’r adeg pan fyddant yn cyrraedd nes byddant yn mynd ar yr awyren, ac o’r adeg pan fyddant yn dod oddi ar yr awyren nes byddant yn gadael y maes awyr.

Mae’r cyfleusterau canlynol ar gael:

• Tri man galw cymorth arbennig yn y meysydd parcio a thu allan i brif fynedfa y derfynfa

Gall teithwyr ddefnyddio’r mannau galw hyn i roi gwybod eu bod wedi cyrraedd.

• Derbynfa cymorth arbennig yn y neuadd gofrestru

Cesglir gwybodaeth berthnasol er mwyn penderfynu faint o gymorth fydd ei angen ar y teithwyr, a bydd yr holl broses yn cael ei hegluro yma.

• Cymorth i deithwyr sy’n hedfan o’r maes awyr

Gall teithwyr sy’n hedfan o’r maes awyr ac y mae angen cymorth arbennig arnynt gael cymorth wrth gofrestru, wrth fynd drwy'r System Ddiogelwch, yn y lolfa ymadael ac wrth fynd ar yr awyren.

• Cymorth i deithwyr sy’n hedfan yn ôl i’r maes awyr

Gall teithwyr sy’n hedfan yn ôl i’r maes awyr ac y mae angen cymorth arbennig arnynt gael cymorth i ddod oddi ar yr awyren, i fynd drwy’r rheolaeth pasbort, y tollau a’r neuadd gasglu bagiau.

• Cymorth i’r maes parcio neu at drafnidiaeth gyhoeddus ar y ffordd wrth ddychwelyd

Gall teithwyr gael cymorth i fynd at y mannau cymorth arbennig yn y meysydd parcio neu at y cyfleusterau trafnidiaeth gyhoeddus sydd ar gael.

Rydym yn argymell i deithwyr archebu’r gwasanaeth hwn ymlaen llaw gyda’u cwmni neu eu hasiantaeth deithio, neu yn uniongyrchol â ni trwy ffonio 01446 729329 neu anfon e-bost i PRMDesk@cwl.aero

I gael gwybodaeth am y ddeddf newydd i Deithwyr â Symudedd Cyfyngedig ewch i wefan y Comisiwn Ewropeaidd drwy glicio yma; gwefan y CAA (Civil Aviation Authority) drwy glicio yma neu wefan y Comisiwn Cydraddoldeb a Hawliau Dynol drwy glicio yma.

Mae'r cyfleusterau canlynol hefyd ar gael:

• Mannau parcio wedi eu neilltuo a lloches arbennig yn y man codi/gollwng teithwyr
• Pafin isel wrth fynd i mewn ac allan o’r derfynfa
• Gellir gollwng teithwyr y tu allan i'r brif derfynfa
• Cadeiriau olwyn ar gael trwy’r derfynfa. Gall teithwyr ddefnyddio eu cadeiriau olwyn eu hunain nes byddant yn mynd ar yr awyren; cysylltwch â’ch cwmni awyrennau
• Lifft rhwng bob llawr
• Toiledau arbennig ar y llawr cyntaf, y lolfa ymadael a’r derfynfa gyrraedd
• Man aros arbennig yn y lolfa ymadael gyda ffôn isel am ddim, sgrîn wybodaeth am awyrennau a chylchwifren 
• Mynediad cyflym drwy'r System Ddiogelwch
• Gwasanaeth minicom ar gyfer y byddar a’r trwm eu clyw yn y Ddesg Wybodaeth
• Cylchwifrau wrth gofrestru ac mewn mannau eraill
• Gwybodaeth am awyrennau ar sgriniau ynghyd â chyhoeddiadau llafar
• Ffonau ar lefel isel ar hyd a lled y derfynfa
• Lifft arbennig i fynd ar yr awyren
• Gwybodaeth am gyfleusterau ar gyfer teithwyr â symudedd cyfyngedig a bwydlenni mewn Braille.